Reseña

Arapy oñemboja’o umi omombe’úva tembiasakue ha umi nomombe’úiva apytépe”, he’i’akue Gabriel García Márquez. Umi ñe’ẽ hyapu che ãngape peteĩ tyapujoapýicha osapukáiva chéve che ryepy guive, peteĩ ñehenói omohesakãséva ikatúpa che avei aipyaha mombe’u ombojoajúva omoñe’ẽvare.
Akóinte tembiapo heñóiva jehaipy ha apytu’ũ guapýgui, taha’e heñóinteva térã osẽva huguaite guive ohechaukávo haihára ñongatupy ñemi. Hákatu, hetajey oĩ kyhyje oje’évagui ha’etévaicha ohapejokóva apytu’ũroky ha ombopiru kyre’ỹ.
Upeichavérojepe oĩ chemyañáva amoheñói mbaretevéntema umi yvytyrata okapurõguáicha. Ha chemandu’a upe ñe’ẽ’apesã omyesãkáva che rape: “Che potapyeta jehupyty imbareteveva’erã che kyhyje jejavýgui”
Akóinte aikuaa’akue táva akakuaahague, aporohayhuhague ha chekerayvotyhague ha’eva’ekue tenda iporãvéva ko tembiasa aikuaaukáva peẽme. Tembiasa hapekõi ha ombojoajúva jehasapyre, jehasa asy ha tekoha ñembyai ha pokarẽ ojohupytýva jehayhupy mbaretére ha umi tenda iporãvéva Pirybebuy-pegua ojehecha’ỹrõguáicha mborayhu ohasáva arapukukue.