Reseña

Guarani ñe’ẽ jeporu pukarã, tie’ỹrã, ñembohoryrã, jeja’orã, ha ambue mba’erãnte ohecháva heta ñane retãyguára, ko’ág̃a ohasa ko’ã mba’égui ambue mba’épe, naymaguareichavéima ojeguereko ha ojehecha oĩmagui aranduka ojehaíva heta mba’ére, oñembokuatiáma ojehóvo ñe’ẽ ha aranduty ohejáva ñande pópe ñande ypykuéra.
Guarani jehai rembiasakue ojehakykuererekátaramo ojehecha mba’éichapa oĩ’ypýramoguare umi kuaitára Paraguay Colonial ryepýpe ojehai guaraníme umi ypykuéra remiandu, upéicha avei Jesuitas ha’e pe oguerojera’ypyva’ekue guarani iñembokuatia rupive taha’e ñembo’e, jehekombo’e ha ambue.
Oñemoneĩ rire Guarani ñe’ẽ Paraguay retã ñe’ẽteéramo oñepyrũ oñemba’apove oñembohekóvo oñeikotevẽháicha, upéicha avei ojeroike rire tekombo’e ryepýpe oñemba’apove oñeguenohẽ hag̃ua opaichagua jehaipy ha moñe’ẽrã, taha’e ñe’ẽporãhaipyre (mombe’urã, moñe’ẽrã, ñe’ẽpoty, mombe’upuku ha ambue), péichante avei, ñe’ẽtekuaa, tekojoja, tesãirã, jehai yma ha hetave mba’e rehe; iporãvéva niko pe oñeguenohẽ ha ojeikuaauka ko’ã mba’eporãita ojejapóva ha tojeporu oñeikotevẽhápe tekombo’e ryepýpe.
Péicha, ojehecha ko arandukápe “Ñe’ẽñemombyky” rehegua, ha tuicha mba’evéva ojejapógui “Guarani Ñe’ẽrekuaa rehegua”, ko’ã mba’e niko pe oñeikotevẽvéva ojehechaukapotávo natie’ỹrãinteha ojeporu oje’eháicha pe mamórupi.
“Maria Celia Medina Vera”, mbo’ehára ikatupyrypajepéva, oñeha’ãmbaite ohechauka “Gramática Guaraní y sus Abreviaturas” rupive, omoĩvo ñande pópe, jahupyty hag̃uáme ijyvyku’i ra’ỹimi ikatuhag̃uáicha oipytyvõ mayma Guarani mbo’ehárape ohekombo’e jave mbo’ehaópe, tove avei toipytyvõ Guarani ñe’ẽ Ñe’ẽtekuaápe tokakuaave ára ha ára mba’ekuaápe.